紅魔踢殘隨時食驚風散

猪拉多纳

英超快車埋身搏擊拳拳到肉，搞到費格遜都緊張到暈，淨係睇佢喺場邊同球證嘈到面紅耳赤，就知道賽事頻密好惡啃，2012年告別戰對住近況回勇嘅西布朗，踢到殘殘哋嘅「紅魔」又會食盡驚風散！（有線200及300、廣東體育周六晚11:00直播）
西布朗撻番着唔易啃

呢季英超踢咗過半，最具觀賞性球隊肯定係曼聯，戰況緊張刺激峰迴路轉，費格遜依然好火，「打鵲」反敗為勝喺場邊七情上面，試問有邊隊波畀到球迷咁高度娛樂性嘅畫面？當然，亦要讚一讚對手紐卡素逼到曼聯要施展渾身解數！

曼聯之前兩場同史雲斯、紐卡素搏到盡，呢場對手西布朗亦非善男信女，咪話獅子開大口要大炒，有3分落袋已經收貨！

事實上，西布朗經歷咗前幾輪嘅低迷之後，逐漸搵番狀態，最近喺聯賽取得2勝1和不錯成績，如果西布朗今場作客堅守佢哋擅長嘅穩守突擊戰術，相信「紅魔」要打醒十二分精神，諗諗計先有望贏波而回！