貝碧托夫聖誕連環爆

猪拉多纳

拆禮物日富咸有福星

保加利亞射手貝碧托夫一向畀人感覺懶懶閒，所以被稱為「hea碧」，不過，呢位富咸前鋒近季喺聖誕後叉足電演出特佳，翻查往績，佢効力曼聯及熱刺時喺呢段賽期入球率超高，過去5季10戰加埋轟入15球，平均每場射入1.5球！
近5季共入15球

貝碧托夫上季喺曼聯備受冷落，但教頭費格遜都喺聖誕賽期重用呢位射手，佢喺拆禮物日鬥韋根大演帽子戲法，接住喺除夕鬥布力般流浪再梅開二度，兩場波轟入5球，表現一流！貝碧托夫10至11季度聖誕後兩戰更包辦曼聯3個士哥，演出神勇，佢喺曼聯4季聖誕後八戰轟入11球，超誇張！大家可能會話「紅魔鬼」係班霸，hea碧入咁多波好正常吖，但呢位保加利亞射手07至08打緊熱刺一樣咁醒，其中鬥雷丁一戰大四喜，勁到爆。

埋單計數，貝碧近5季聖誕後共入15球，効力嘅球隊聖誕後兩戰10場波加埋錄得8勝1和1負，唔知今次主場對修咸頓幫唔幫到富咸手呢？
愛華頓連續6季細

另外，愛華頓喺聖誕後亦有條特別攤路，佢哋近六季聖誕後首戰例牌開細，六戰錄得兩勝四和，其中五場開雙，四場開出總入球二，對上三季都開出一比一波膽，今年佢哋喺主場迎戰韋根，唔知會唔會延續呢條「細」路呢？