荷蘭收服「三獅殘兵」

猪拉多纳

29/02/2012


2012年歐國盃仲有100日殺埋身，各路雄師、球星球迷齊齊進入備戰狀態！今晚國際熱身賽焦點英格蘭喺溫布萊主場鬥荷蘭，三獅兵團無論看守領隊皮雅斯同一大班邊緣新星，都想爭取表現趕上歐國盃尾班車，可惜今場佢哋群龍無首，殘陣出戰，對住星光熠熠嘅「橙軍」仲點搵着數？平手盤捧荷蘭坐走望贏啦！（now671、672台及廣東體育周四凌晨4:00直播）


戴倫賓特長抖緣盡決賽周


英格蘭近排黑氣纏身，主將泰利捲入種族歧視風波兼受傷長抖，被褫奪隊長臂章之餘，連帶領隊卡比路都發老脾辭職，暫時只搵嚟U21領隊皮雅斯頂住，呢位前國腳近排公開表示想坐正帶隊踢歐國盃，但佢始終缺乏A級國際賽領軍經驗，想駕馭一班大國腳實在唔易。




可能帶慣小國腳，皮雅斯今次點兵都起用唔少新人，林柏特同里奧費迪南等老將齊齊落選，不過主將朗尼因病唔玩，戴倫賓特尋日證實左腳足踝韌帶撕裂要抖3個月，極可能緣盡歐國盃。而湯卡華利同基爾獲加又因傷退隊，搞到前線孭飛嘅費沙甘保、史杜列治同韋碧克夾埋先得4頂喼帽，大賽經驗輸晒，今晚對住世盃亞軍荷蘭都係捱打居多。唯一好消息係，由足總官網舉辦嘅「2011年英格蘭最佳球員」投票，効力熱刺嘅中場柏加以17%得票率當選，門將赫特同翼鋒艾舒利楊格就排第2、3位，證明呢幾件國腳都比較弗。


荷蘭尹佩斯 洛賓孭飛


荷蘭呢邊，主帥雲馬維克大軍入面有7個英超兵，對英國波自然熟晒路，射手尹佩斯今季喺英超踢到曉飛，自然係英軍心腹大患。事實雲帥仲講明會重用洛賓同史奈達兩名經驗戰將，期望呢對老拍檔可以擦出火花，擺脫各自喺所屬球會低潮。難得可以再合作，應該唔難擦出火花，有佢哋喺前線發辦，要贏波又有幾難？