畢咗業成績一樣咁好 楊明綸有W送兔

猪拉多纳

　　楊明綸自從畢業升格後，頭馬陸續有來，目前已累積19場W，而剛戰停賽復出，更以師父一對馬「明旺」及「享耆成」成功起孖，不讓當晚同樣係復出嘅柏寶專美。

　　今期兔年最後一次賽事，阿楊出馬7匹，望望呢批馬對上1場賽績，有半數馬上次唔係贏完就係跑第二，最終成績係點？我唔敢寫包單，如果以佢嘅手風，加埋咁嘅陣腳，要有W落袋，應該唔難。

　　佢手上之馬「陽光王子」、「精靈勇駿」、「八飛」及「福到多多」，上場全數冇W有Q，當中自己比較睇淡可能係五升四班嘅「八飛」。但餘下3駒，預料係阿楊兔年送歲賽頭馬希望所在。

　　先談「陽光王子」，上場有內檔即刻變了另一匹馬，後上與「過關勇將」構成連贏，雖然當時有可能因內欄慳位所致，今場一樣有同樣可能存在，唔排除賺完又賺，而與「時時攞彩」份屬同父馬，泥地唔應該抗拒。「精靈勇駿」集中在直路賽角逐，上場終於贏到，姿態也輕易，就算加磅後略略令實力下降，亦不致沒有再捷本錢。最後係「福到多多」，三四班此程各取1W，處於銳不可當之時，未必會打退堂鼓。

Jack