馬主論戰

猪拉多纳

　　塑料勁加罩出招

　　我一位嚟自北京嘅好朋友郭飛，呢幾日嚟咗香港同我哋一齊過新年，聽日更加係佢嘅生日，我響度祝佢生日快樂、身體健康！講番心水，推介頭場「塑料勁」，前仗響1400米追入一席亞軍，證明有實力，今次跑番呢項路程，仲要重戴眼罩上陣，一定搏甩髀。

　　另外鍾意第三場「綻放美麗」，呢隻馬已連續兩場跑第三，今次增程跑1200米，排埋一檔起步，怕且係時候開齋。　張敬山

　　夢幻十一捧得過

　　剛啱紀仁安開齋兼封王，呢位神奇小子終於演出身價，今次一於再吼佢啲馬。鍾意第五場「大喜象」，前仗響1400米後上跑第三，後勁絕對唔簡單，上場跑包尾遠離水準，敗績大可抹去，今次換紀仁安操刀隨時施回馬槍。

　　另外推介第八場「夢幻十一」，大前仗同「洪福齊來」雙雙彈甩對手，已證明響三班惡氣十足，今次對住明星馬「名舵主」唔一定冇得爭，有合理分頭更值得捧場。　任達華

　　鐳射槍轉場必拼

　　今日我哋隻「鐳射槍」有份上陣，呢隻馬今季四戰兩獲獎金，表現唔算太差，今次轉番嚟沙田上陣，用番何澤堯減磅，希望可以響新一年打開勝門喇！

　　至於重頭戲第八場華商會盃，大摩出夠四隻，睇嚟對呢隻盃志在必得。

　　我睇好由杜利萊騎嘅「傾力之城」，前仗壓倒「甜將」贏馬，計實力唔會輸蝕，快馬排到一檔起步，應可一早搶出貼欄領放，話唔定就此放到。　寇鴻萍、梁廷鏘