布強陣 迎新年 蔡約翰慷慨派糖

猪拉多纳

        2012年眨吓眼又到，上年今日一堆頭馬如「好心星」、「美麗傳奇」等等，好似事隔唔係好耐，由此可知，日子真係過得好快，時間唔會等人！所以，做人做事，千祈咪浪費光陰。
        
        新年將會揭開新一頁，大家有冇咩新年願望？其實，乜都假，喺馬場就想最係發財！唔理係80後，抑或50前，邊個唔想贏錢？！係要同錢鬥氣，除非本身腰纏萬貫，或者係思覺失調吧。在此祝願讀者們喺2012年首個賽日，能夠旗開得勝。
        
        至於大節日，邊個練馬師咁慷慨，會派糖畀各位馬友，可能係蔡約翰都唔定。佢在今次賽事應該立心出擊，一睇列陣，「勁卒過河」、「名舵主」、「陽明飛飛」，全部係新勝馬，佢肯攞幾件啱啱贏完嘅馬擺埋喺同一日，為咩先？正常思維推測，梗係想連場搏命。
        
        「勁卒過河」連贏兩場谷草1200米，轉到田草或形勢唔同，不過，隻馬真係愈贏愈勁，上場負重都唔怕，而呢場只加2磅，仲喺四班跑，1檔放出就叫胡嘞！「名舵主」及「陽明飛飛」，今季未輸過，一再掄元過程輕鬆，氣勢咁勁，試問對手點擋。Jack