馬主論戰

猪拉多纳

新強勁泥地一流

　　今日有六場泥地賽，揀番啲有場地根據嘅馬捧場唔會錯。先揀第四場「新強勁」，呢隻馬泥地出色眾所周知，季內三戰泥地賽更取得一冠兩亞，難得今場仲可以響四班上陣，且連拼後體重不跌反升，一定鍊盡。

　　另外鍾意第七場「點石成金」，季內四戰取得一冠三季，演出準之餘，亦曾經響泥地上過名，證明場地啱發揮。繼續交由韋達操刀，同場對手唔見得強，應該可以贏番一場。

張敬山

鼓浪春風出頭

　　伍碧權今季表現唔講得笑，剛戰起孖之後已贏夠十三W畢業，今日一於吼實佢手馬。鍾意第二場「鼓浪春風」，上場唞八個月復出都喺直路賽入位，熱身之後肯定有更佳演出，出頭在望。

　　另一匹伍廐馬，推介第四場「精算拍檔」，今季三場都跑第五，已盡收熱身之效，泥地一哩以往贏過，場地性能一定冇問題。大部分前安廐馬今季轉入伍廐後都有好演出，相信呢隻馬都唔會例外。

任達華

精彩遊戲要吼

　　剛戰蔡約翰大搏殺，但只得「名馬」贏咗，其餘「競駿寶寶」、「閃耀之星」都只跑第二，運氣差咗少少。不過，今日呢個倉有唔少數胡籌碼，應可贏馬補數。

　　推介第六場「精彩遊戲」，上次初跑1400米，欠路程根據之餘仲要漏閘，最後都追入第五，演出唔曳，今場如冇意外贏得。另外鍾意尾場「財運」，近三戰全部入位，四歲馬大熟大勇，轉嚟泥地上陣應該啱跑，要吼實。

寇鴻萍、梁廷鏘