谷中霸王冇「掃場」好耐 方嘉柏隨時出手

猪拉多纳

       方嘉柏上季9月已兩度喺跑馬地賽事中三元（10年9月8日及9月23日），今季暫時只係保持每月兩W，仲係未試過起孖嗰隻，谷中霸王嘅雅號亦漸漸畀人遺忘（暫時谷草勝出率不足10%）。不過，今次小方分別搵咗杜利萊、巫斯義同郭能等大師傅助陣，徒弟仔何澤堯亦幫手騎兩件，睇陣勢，谷中霸王似乎想趁11月最後一戰重新振興。
        
        望望方廐出賽馬，巫斯義「喜寶寶」、郭能「火燎腚」同何澤堯「星運俊爵」都有得諗，全部唔係熱門馬，博佢哋跑到入三甲，齋買P，可能已經有唔錯回報。
        
        「喜寶寶」有接近兩年未上名，對上1次要數到09年12月，咁耐冇表現，捧W唔係明智之選，但巫斯義對呢匹久沉馬未放棄，騎完又騎，唔通淨係因為交情關係，應該唔係啩？！實在，此駒3仗前曾在四班同程追得不俗，當時差唔多高過依家10分，所以，呢次跑短400米，可能有唔同發揮。
        
        「火燎腚」及「星運俊爵」，前駒剛賽早段放得太快，捱唔到尾好正常，而今賽換人及轉路程，形勢有別，仲重新戴脷帶，或對控制方面有幫助。後駒特登唔跑田泥，轉到谷草本來冇乜根據，好彩佢速度夠快，唔難由大外檔切入，如能順利擺前走，或可帶返。Jack