卡達聖曬冷王雙龍出海 盃王大摩搶銀袋

猪拉多纳

　　大摩日前派出「火龍駒」遠征，接戰尾隨過終點，而今日佢喺主題盃賽婦女銀袋，派出兩駒迎戰，「卡達聖」和「曬冷王」，計實力在該場高晒咁滯，或者可以補番數！

　　暫時為止，大大小小盃賽跑咗10項，素有盃王美譽嘅大摩，只係贏過一項獅子會國際會長盃咋，之前級際賽如沙田短途錦標及國慶盃，佢出馬唔少，但硬係贏唔到，嚟到今期婦女銀袋，應該係時間「騷」料。

　　大摩向來在盃賽運籌帷幄，有時好難估佢邊1匹係主力，就算係主帥白德民嘅坐騎，久唔久虛則實之，所以，硬係要二揀一，未必上上之策，倒不如兩駒擸晒，或者仲有驚喜。

　　事實上，「卡達聖」和「曬冷王」又真係好有機會齊齊返嚟，一對馬初出都跑得好，前駒1400米明明係路短，結果一樣有Q；後駒上場1600米喺內欄衝得唔順仍有殿軍，已覺本事。總之佢哋轉到長途，應可展示出真正實力，隨時幫波士喺今場串Q。

Jack