告東尼智取3W上榜首

猪拉多纳

告東尼擒日響兩場重頭戲本地三級賽沙田短途錦標及國慶盃無份捧盃，卻贏「超綵」、「好好機會」及「福智」成為今季首位連中三元嘅練馬師，並以6W躍升榜首。
       
福智閘前瘋狂落飛，信心十足。

東廐大出擊，當中頭馬當然預埋愛徒蔡明紹份，「好好機會」成功補中，連埋韋達騎「超綵」，兩隻大熱溫拿包辦第三口孖寶，其後「福智」錦上添花，殺敗擒日賽事擂台躉「醒目精英」，盡顯告仔練馬功力。其實呢場頭馬，亦有另一個啟示，落飛黨始終係無寶不落，擒日「幻想家」先嘗甜頭，繼而響「卡加大師」等駒落飛失手後，隨之又響「福智」身上補番數，由20倍跌至9倍贏馬。
       
告東尼（左）與楊明綸今季首次合作即勝。
全部唔同騎師贏

而告東尼贏三場，頭馬出自蔡明紹、韋達同楊明綸，練者部署手法相當多元化，嚟緊周四賽事，告東尼又有另一位老友巫斯義將會崔護重臨，嫡系未到已經大殺三方，下期賽事睇吓佢會唔會又有頭馬安排畀阿巫接風。