洪禮賢講馬：跨季孖寶等叫胡

猪拉多纳

　　現時馬季唔算短，歇暑期頭搭尾冇兩個月，部分賽駒要喼住狀態，其實應該唔係太難，再唔似得以前咁，郁吓個暑假會有兩個幾月，因為疏懶身手嘅日子有限之嘛，呢頭喺7月中停火，一陣又話可以出圈操練，所以，有部分馬，喺上季尾跑得好好哋，隔完1個暑假，要承接之前嗰段餘勢，可能性比以前高。

　　睇番上季開鑼日，就有匹「天久」成功製造跨季孖寶，大熱勝出一年一度嘅特首盃，雖然當日十場頭馬，只係得一匹馬咁嘅本事，又雖然呢匹馬係特別勁，唔係太啱攞嚟做個案，之不過，仲有「錢照贏」、「紅跑車」及「夢幻組合」等駒，喺前季尾贏完，到咗上季首日，仍然交到好成績，「錢照贏」及「紅跑車」都跑第二，「夢幻組合」則獲季軍。

摩廐馬近課醒神

　　當然，有啲馬未必可以隔完個暑假之後，依然有番上季尾嘅餘威，呢點要視乎隻馬本身嘅進度、練馬師嘅功夫，以及收咧後有冇頭暈身㷫嘞。

　　日前睇過一批摩廐馬出跳，有啲望落好似唔覺唞過，幾醒神，係咪得個「殼」，唔敢講，至少試起上嚟身形ok兼力度唔錯，好似「風雲武士」及「醒目精英」，話唔定有機會炮製跨季孖寶。

馬會賽馬節目主持　洪禮賢