洪禮賢講馬：唔賭唔知時運高？

猪拉多纳

　　生命中，有些人係唔應該遇上，不幸喺時空錯誤重叠，畀你撞個正着，惟有硬食，但隨之而來嘅賽果，粉身碎骨有之，長嗟短嘆有之，生不如死有之，就淨係冇好事發生之嘛！

　　情路上遇到騙子，財色兼失；生意上遇到大鱷，淪為點心；工作上遇到麻煩友，飯碗不保。命中早註定，合該倒霉。

　　有時想解困， 試圖衝出重圍， 走得甩又點，拖着傷痕纍纍身軀，自己大叫解脫，原來只係慘勝囉。

　　放諸賽馬之上，有些場合，賽前點度都冇用，橫睇、打戙睇、坐喺度睇、瞓喺度睇，仍然嘔唔出半點思緒，大腦功能好似便秘。呢個時候如果夾硬催眠自己，一定要參與其中，根本自討沒趣。

　　有句俗語：「唔賭唔知時運高。」呢番話究竟係上聯啱，定係下聯錯都好，亦唔使試晒自己啲運，去到咁盡。

集中火力贏輸也轟烈

　　1日跑11場馬，就買足11場，WPQT瓣瓣叉隻腳落去，到頭來，可能叉咗落個氹。「博愛」二字，喺馬場未必啱使。

　　呢個世界如果真係冇焗賭，倒不如將啱心水場合夾叠買過關嘞，中與不中也轟轟烈烈。