馬主論戰

猪拉多纳

喜惑夠準信得過

　　今季冠軍練馬師誰屬，跑埋今日賽事就會知，但冠軍騎師就篤定由韋達冧莊，今日佢啲坐騎惡氣十足，值得捧場。最鍾意尾場「喜惑」，今季跑六場得三W三P，演出真係準到不得了，今次再跑1400米，韋達攞番嚟騎，值得信賴。另外推介第七場「朝東飛駒」，上次我都有介紹，結果跑入一席第二，今季轉呂廐後仲未贏馬，選擇響煞科日再上陣，肯定搏盡求交代。

張敬山

愛蓮說增程要吼

　　何良剛戰憑「魅力星」同「清風送爽」兩匹冷馬起孖，搏殺手風好順，而後駒今日更匆匆再出，跑尾場1400米。睇番「清風送爽」上季其實響此程追近過「天久」，路程一定啱跑，今次隔幾日又跑，擺明想趁勇添食，咪睇小。另外，推介第五場「愛蓮說」，今季搏嚟搏去都仲未贏到，今次索性增程跑1800米一試，呢隻馬幾均速，話唔定就咁試出彩虹。

任達華

神聖駒質素高W

　　雖然韋達已篤定做今季冠軍騎師，但剛啱柏寶響谷草中三元，演出都好出色，今日後者亦有多匹實力坐騎，應該會繼續做齣好戲。推介第二場「神聖駒」，上場初出即響直路賽爆冷殺入一席，質素唔會曳，今次增程跑1200米，搵嚟柏寶操刀，開齋在望。

　　另外鍾意第七場「中環英雄」，上季殺得低「雄心威龍」，三班唔會留得住，要贏番一場冇難度。

寇鴻萍、梁廷鏘