皇帝法令長跑長有

猪拉多纳

天氣轉好，沙田昨午賽事甫開始就連場開紅盤，頭五場溫拿，韋達同柏寶兩大重心輪住贏，而且由第二場開始更加一口氣分別憑「冰火」、「兵奇臨」，「勁贏晒」、「傑出君子」，「皇帝法令」、「按一按」串三Q，到尾場再有「滿綵」搭「戶外名駒」，全日共串四Q認真犀利。
       
皇帝法令增程打開勝門。

韋達連場數胡，當然唔會少咗好拍檔蔡約翰份，「皇帝法令」捧成1.5倍一面倒大熱，雖然加程初跑轉彎1200米，但係贏馬姿態依然談笑用兵，馬主馮柏棟今季養馬運氣相當好，養響大摩度嘅「皇帝旨令」已經執咗5W，擒日又憑呢匹「皇帝法令」贏馬，適逢父親節，佢就話同埋囡囡馮穎詩齊齊拉頭馬，相當有意義。
       

馮柏棟仲話前晚響電視睇賽馬節目，先至知「皇帝法令」今場用咗新嘅口銜鐵，可能呢場改換配備下，馬匹情緒穩定咗，表現亦隨之進步，佢就認為呢匹「皇帝法令」長線仲可以跑長啲，今季會唔會再跑，就要留番畀阿John去決定。