內圈探索：沙紙身輕步開揚

魑魅魍魉

　　今晚谷中八場賽事，雖然姚本輝馬房只得四匹戰馬列陣，但全部實力不弱，其中以「超晒班」與「沙紙」最具分量，均交由黎海榮執韁，且看能否增添頭馬進帳。

　　出爭第三場四班1200米的「超晒班」，上仗在黎海榮胯下跑同程，採主動跑法，雖然途中馬鞍滑移，但最終仍能一放到底掄元，以半個馬位擊敗「贏馬組合」。此駒贏馬後被加七分，目前仍能留在四班上陣，相當有利，復課後操練並未放緩，連課拍跳好火有勁，埋門踱步狀態對辦。今回再戰勝途谷草1200米，仍排內檔起步，可望再下一城。

　　列陣第六場三班1200米的「沙紙」，上仗初跑同程，在黎海榮胯下以兩個馬位不敵「夢仙」得第二，初跑窄場能有此演出，其實已不失禮。

　　試準窄場性能之後，「沙紙」近日續做工夫，日前加眼罩彈閘，走來火旺力足，埋門踱步所見馬身輕巧，步幅開揚。今回此駒再戰谷草1200米，途程理想，加眼罩上陣應有正面幫助，抽得黃金一檔形勢有利，續配黎海榮可望勝回一仗。

家明