都爾搵奶粉錢 日月暉華順勢添食

魑魅魍魉

預計次女將於下月出世的英國好手都爾，為積極搵奶粉錢，近期演出非常勇猛，上周末憑冷門馬「龍勝」增添進帳，盡顯功架。論到明晚谷戰，都爾則策騎六駒上陣，當中來自舊波士梁定華的「日月暉華」、「回鄉精神」及「贏啲啲」均具餐士，騎者有權連勝三日。
       
日月暉華上周三在都爾胯下後上開齋。

已屆五歲的「日月暉華」，上周三晚於谷草千二米後上險勝「森淼獵鷹」。今趟升上三班再攻同程，都爾認為打鐵趁熱可再贏，他說：「『日月暉華』由於跑法較被動，往往需要快步速配合才能交出最佳水準。剛戰遇上早段有馬鬥搶，結果後上開齋，今次同組有『聚有盈』、『勁信心』及『常山鳳寶』等快馬，預計步速應偏快，所以形勢對『日月暉華』依然有利，可望乘勇再下一城。」
       
都爾
贏啲啲上仗輸運

至於頭場的「贏啲啲」，剛戰於五班泥地一哩跑第二名，今趟轉爭谷草，都爾說：「剛戰『贏啲啲』本有可勝之道，奈何沿途多番受困，末段望空發力時已被頭馬『快馬當先』走甩，殊不夠運。此駒性能廣泛，以往曾於谷草此程交出頭馬，今仗大有機會收復前失。」