高清睇跑馬：聚有盈仍未止步

港陌

　　「聚有盈」六歲馬年紀唔輕，對上三季亦僅贏一場，點估到最近過檔方廐後大有進步；前仗轉倉首戰即於總場次525贏五班谷草1200米，而上仗於總場次 551轉爭四班同程，居然贏到對手冇得跑，不用打鞭已輕勝三個多馬位。再睇時間更嚇人一跳，跑出1分09秒95，乃今季四班同程第三快時間，而頭兩位的「千兩寶寶」及「開心好多」均在九月時的偏快場地跑出快時間，但「聚有盈」上仗只是半力取勝，可見仍有大把在手，今仗再跑強項篤定三連捷。

　　「延續美麗」由告仔接手後即脫胎換骨，首戰於總場次353谷草1200米落飛搏殺，若非排十二檔蝕位太多，相信已一擊即中而非跑第三。接着兩戰繼續上名，直至前仗於總場次498的田草1000米終坐正，但該場為四班賽兼贏鼻位，以為水準不高，點知上仗於總場次539的三班直路賽再下一城，跑出 55秒77亦比當日贏公開賽的「金德寶」快兩線，同時亦係今季田草同程第二快時間，可見進步之多。這匹谷草起家之馬今重返谷戰唔係問題，再睇番此駒上周六彈泥閘，落腳急勁有力，就算排十一檔亦要吼。

Sam