駕寶落飛得手

猪拉多纳

擒日跑到第六場，除咗天色急轉直下，臨場電算機亦風雲色變，結果呢場頭馬「駕寶」起飛跌至七倍，就此一擊得手，呢場頭馬亦正好為伍碧權帶來今季第11Ｗ，鼓其餘勇，相信伍碧權短期內要贏夠13Ｗ應無難度。
       
駕寶直路以凌厲後勁勝出。
騎練賽前信心十足

據「駕寶」馬主之一劉偉健表示，賽前伍碧權同梁家俊都表示好有信心，結果臨場表現並無令佢哋失望，一眾在場親友ＷＱ大有斬獲，以「駕寶」今季由姚廐來投，為權哥贏出兩Ｗ，論地位重要，真係同季內三捷之廐侶「天外之天」不遑多讓，承接勝勢，相信「駕寶」季內仲會幫馬房增添進帳。
       

講開權哥，其實擒日如果運氣好啲，頭馬分分鐘唔只一場，全日出馬五匹，除「年年如意」無獎金外，其餘四駒冠亞季殿各一，咁高上名率，足見練者戰意高昂。