高清睇跑馬：威威多星屆勝時

港陌

　　「威威多星」今季於總場次93初出， 即在田草1200米跑第四，點知之後場場冇影，小方唯有變招， 於總場次266替牠綁脷，效果一般後接戰加防沙眼罩，前速即變得銳利，前仗縮落谷草1000米搏殺，排十檔留前鬥後無可厚非，點知入直路拉出外檔蝕位，大半條直路塞車下僅得第五。上仗總場次471跑番谷草1200米，臨場有重飛，但增程下前速變得平平，沿途留守尾二位置，至慘入直路遲遲先撻着，空有超強後勁也再次姍姍來遲，戰果雖失望，卻證明質素不差及以谷戰最合，搵啱出路係時候交代。

　　「活力至寶」由大摩兒子一手引入，作風當然急進，上季初出配馬偉昌試準後，接戰回配白德民即贏田草直路賽，再出則於田草1200米以短距離不敵「蜚聲」跑第二；到總場次618初跑谷草1200米，排十檔一樣飛到馬到勝出，足證質素甚高。經暑期休養生息後，今季此駒首仗即於直路賽再響勝鼓，之後就算腳傷小休三個月，但上仗於總場次464田草1000米復出，末段衝刺勁如炮彈，可惜影相飲恨冇運；今戰回師強項谷草1200米，跑出水準篤定補中。

Sam