蕭氏幻想家響頭炮

魑魅魍魉

尋日「幻想家」先拔頭籌，大馬主蕭百君同屋企人興高采烈齊拉頭馬，惟身為馬主嘅蕭劍平，遲遲未見人，原來係等住接埋太太同ＢＢ入場，最終趕得切一家人影番張家庭頭馬相。
       
接埋ＢＢ及時趕到

雖然淪落至五班先贏馬，不過蕭劍平就認為愛駒屬於一匹慢熱長途馬，所以要畀啲時間佢慢慢熟習，既然現階段長途無表現，所以同徐雨石商量過，今場縮程跑一哩，結果響韋達刁鑽走位下採取主動跑法，賺盡步速下就此爆出九倍半冷W。
       

蕭氏家族近年成為炙手可熱嘅馬主家族，響前日嘅香港國際馬匹拍賣會又見積極參與，雖然二公子蕭劍新擬競投最高價750萬嘅lot.2失咗手，最後仍以520 萬購入lot.18，咁啱係作為07/08徐雨石練馬師團體嘅補替籤，石哥正好以「幻想家」為蕭氏家族帶嚟頭馬，總算係合晒時宜。