駿馬飛騰小方出殺着

猪拉多纳

練馬師訓練馬匹各師各法，例如方嘉柏就特別喜歡安排戰馬出擊前一周試閘，無論馬匹當時表現如何，陣上多數會有好成績。今晚第三場之「駿馬飛騰」，上周五獲安排出試泥閘，方嘉柏對此駒似乎特別緊張，昨朝試閘前罕有地叫埋徒弟何澤堯，一齊行去烽火台共商大計，沿途邊行邊傾相當積極。
       

「駿馬飛騰」血統顯示適合跑中距離，已在短途兩度熱身，今勻轉跑一哩隨時見真章。
       
史卓棟周日暫獲四坐騎

上周末公布將提前來港履新的公司騎師史卓棟，本周日已可上陣，此位南非好手初步已獲得同鄉霍利時提供三匹正選馬，包括「金獅名將」、「好勇駿」及「砲嘜」；至於一向喜歡跟新騎師合作的姚本輝，亦暫定將「寶石玻璃」交由史卓棟操刀。
       

另外，角逐周日本地一級賽香港經典盃的何廐馬「俊鬥仕」，今次將找來普萊西客串，查此組合曾於去年新西蘭打吡跑獲季軍，人馬早已建立默契，且看今次能否再擦火花。