馬主論戰

猪拉多纳

飛躍之鋒啱心水

　　今日汕頭市濠江區外事僑務局嘅區長鄧夏思，將會來港探訪我哋公司，先響度熱烈歡迎，同時亦要多謝我位老友、外事僑務局副局長楊育光引領一班領導來港。今晚我哋將一齊入場睇跑馬，相信佢哋會帶嚟好運。講番心水，我睇好蘇保羅起孖兼捧盃，「飛躍之鋒」試準後勁，係時候交代；「紅衣叻叻」三班夠爭，可捧走扶輪百周年盃。

張敬山

祥禎強項見真章

　　潘頓剛啱憑「冰火」贏馬，搏殺手風幾順，話唔定今戰又有頭馬進帳。先推介頭場「祥禎」，以往兩場頭馬都響四班谷草1000米取得，擺明路有專長，今次落番班即跑強項路程，擺明志不在小，點計都要捧場。另外，要吼實第六場「雨電風雷」，前仗響田草1600米只係以短頭位落敗，現評分一定有着數，轉嚟谷草上陣對手冇咁強，應可贏番一仗。

任達華

兄弟班打鐵趁熱

　　鄭俊偉今晚出馬唔算多，但係全部有實力，我睇好佢有馬贏。先推介第二場「兄弟班」，轉去鄭廐後六戰得一冠兩亞兩季， 演出夠晒準， 增程跑2200米已證明過夠氣量，應該會打鐵趁熱。另外尾場「旋風魅力」都要吼實，上仗終於響谷草一哩打開勝門，自購馬適應水土之後，通常可愈跑愈好，勞愛德停賽，換杜利萊操刀一樣啱，再贏冇難度。

寇鴻萍、梁廷鏘