加州財子起碼值2班

魑魅魍魉

大馬主梁挺生雖已離世，但佢嘅第二代賽馬熱誠無減，佢公子梁欽聖名下初出新馬「加州財子」，響尋日沙田第二場賽事一出即勝，繼續展現「加州」系逢出必拚嘅高昂鬥志。據梁欽聖表示，「加州財子」係秉承佢哋家族一貫自行培育嘅作風，絕對係一手一腳配出嚟嘅心血結晶，呢匹馬嘅母線血統亦甚有淵源，正係過往佢哋名下隻「小婦人」，甚至乎響澳洲贏過二級賽嘅California Dane，更加係「加州財子」同母半兄弟馬，而「小婦人」都係直路賽專家，所以「加州財子」今次初出跑1000米直路賽，梁欽聖話賽前已經好有信心。
       
加州財子慢閘一樣輕勝，盡顯超級本色。
或要接受喘鳴手術

不過，梁欽聖就透露「加州財子」呼吸系統有啲毛病，長線嚟講有可能需要做手術根治喘鳴症，但佢話愛駒尚且年輕，希望稍後情況得到改善，咁就免受手術之苦，梁欽聖認為「加州財子」應該係一匹值二班嘅中短途好馬，當然唔想愛駒因為健康問題而影響成就。