朝早有動靜：好得意開齋在望

港陌

　　不少早前到外地買馬的練馬師，昨朝已返回工作崗位，包括徐雨石、文家良及葉楚航等，各人不停穿梭烽火台與機坪之間，場面熱鬧。首要留意的是徐雨石，已連續兩朝與韋達傾談，今戰兩人合作頭場「好得意」，值得留意。

　　「好得意」上仗跑1400米已有極佳演出，終點前與其後再出再贏的「雄心威龍」單打獨鬥，雖然最後僅跑第二，但已彈甩季軍馬四個身位。今番此駒再戰1400米，應是時候打開勝門。

　　另外，葉、文兩廐剛戰分別起孖及中三元，手風轉順，今次兩廐馬仍具惡氣，必須留意。

　　葉楚航馬房方面，近日除搵韋達、柏寶替旗下馬仄試外，亦有找鄭雨滇幫手，相信倉主必會關照後者。今日葉廐便有多駒交由鄭雨滇搏殺，其中葉楚航對出爭第三場的「人人興旺」最為肉緊，昨朝見他從烽火台走落隧道口問長問短，試後前往沙圈接馬，擺明對此駒高度重視。復課後，「人人興旺」的狀態大有進展，今番增程跑1600米，力足言勝。

文家良緊張富高勝

　　至於文廐方面，要留意尾場「富高勝」，練者返港回防後，即第一時間睇此駒操練，動態異常緊張，小心季內省完一仗熱身後，隨即在今仗搏殺。

韋柏