高清睇跑馬：好得意主宰步速

魑魅魍魉

　　頭場四班草地1400米，「好得意」前仗1200米落飛，也突然改用快放跑法，雖然無功而回，但出戰強組賽事跑第五，仲要全程拍住「甜將」鬥放，末段未有潰不成軍，表現及格有餘。

　　上仗增程跑總場次107四班1400米，路程合適又配韋達，表現當然更好，美中不足遇上「雄心威龍」，大注重飛只跑第二。

上仗水準高

　　睇番「雄心威龍」接戰谷中劣檔再下一城，「好得意」又拋離季軍馬達四馬位，而且蹄下敗將「化工之昇」、「得力助手」、「魅力心」，甚至尾二的「天外之天」之後統統有好表現，再次肯定此席亞軍唔簡單。今戰對手實力平平，採取主動馬也不多，大有機會主宰步速，路合馬勇，可以放心追捧。

　　「香檳歲月」上季多次跑近，最後一戰拼入亞軍，該戰頭馬「肥仔糖」今季也有頭馬見面。「香檳歲月」今季首戰1200米三甲不入跑第六，落敗三個多身位，威脅不大，但要留意大半程走四叠，去到彎尾又走出最外檔，蝕位極多，且該戰水準極高，前列馬匹中除「好勇駿」，「甜將」、「父子兵」、「飛躍之鋒」及「好得意」接戰不是贏馬就上名。

　　「香檳歲月」上仗改跑1400米，全程走外叠，加上冇遮擋依然貫注到尾，拼入季軍，再睇亞軍「雙龍出海」接戰強組入位，確認「香檳歲月」質素極高，現評分好着數，明日補中機高。

Sam