泰國絕地大反擊

猪拉多纳

首回合輸1:2

東南亞錦標賽決賽次回合今晚爆發，衞冕嘅泰國返主場再鬥印尼，泰國首回合作客領先下反輸1比2，今仗冇得揀要絕地反擊！主隊嘅「印尼殺手」鄧達大勇，而印尼反擊戰術亦相當流暢，呢場終極戰似駁火格局，中位數3/3.5球嘅入球大有1.92倍玩得過！

（Now 670及FoxSports Play周六晚8時直播）
射手鄧達對親印尼搵到食

泰國貴為呢項賽事4屆冠軍實力超班，佢哋今屆由分組賽到4強5戰全勝，直到上仗首回合先初次吞敗仗。其實泰國上仗作客領先1粒後明顯輕敵，結果連失2球冇仇報，今仗返主場唔敢怠慢必定喪攻。泰國今屆6仗入咗13球，單計王牌鄧達就有6球進帳，呢位射手榜「一哥」連同首回合嘅入波，今屆喺印尼身上已拎到4個「士哥」，堪稱「印尼剋星」。泰國籍主場之利搶攻，鄧達大把數胡機會。

印尼今屆踢法「有前冇後」，射手蘇路沙喪轟5粒，可惜防守麻麻，每仗都有失球，佢哋今屆6仗比賽法定時間入11球，但同樣失11粒，防線欠穩唔會即時搞得掂，與其死守不如放手一博，隨時同泰國合演「大」騷。