歐聯跟尾馬體會小勝居多

猪拉多纳

又來到歐聯前夕嘅聯賽，係時候要提醒大家，小心下周中要參加歐聯嘅球隊，是日重心係西甲馬德里體育會主場對馬拉加。雖然馬體會於聯賽同「一哥」巴塞咬得好緊，但始終下周中歐聯4強首回合要硬撼拜仁，話冇顧慮就呃你喇，面對防守硬淨嘅馬拉加要讓球半咁辣，肥叔建議大家選下盤。

（Viu TV 99台及now 632周日凌晨零時15分直播）

西甲今季唔再只係巴塞、皇馬之爭，加埋馬體會攪局爭標形勢轉趨緊湊，依家佢哋同榜首巴塞同分，絕對有力爭標。不過馬體會下周中於歐聯4強首回合主場對拜仁，點都要取捨一下，今仗稍作留力亦好正常。肥叔唔係話馬體會一定贏唔到，之不過睇番今仗初盤，佢哋要讓到球半咁多，隨時小勝輸盤。馬拉加冇乜嘢好，最叻係守得兩嘴，單計聯賽作客只失18球，位列失波第4少球隊，加上近6次造訪馬體會，馬拉加雖錄得2勝1和3負唔算標青，但輸嗰3仗中，只有1場係輸多過1球，證明佢哋對親「床單兵團」甚少大敗，趁對手有後顧之憂，呢個下盤值得優先入貨。進取啲可以博3.35倍馬體會「讓球和」。
華歷簡奴鬥皇馬博大盤

至於西甲早場華歷簡奴主場對皇馬，皇馬同樣下周中要打歐聯4強首回合作客曼城，今仗讓到1.5/2球咁多唔值博，問題係對手華歷簡奴亦唔係好貨色，勉強要揀的話捧入球大。

（now 632周六晚10時直播）