賽程緊密 重視防守 多蒙特鬥緬恩斯追細盤

猪拉多纳

今晚德甲由2支當弗球隊交鋒，聯賽榜二哥多蒙特主場迎戰緬恩斯。多蒙特雖然喺上仗歐霸盃主場大數熱刺3:0，不過對方話晒都係英超名牌球隊，相信教練杜曹都唔敢當正自己已經出咗線，預計佢今仗點都會玩輪換，加上佢哋近來喺聯賽長開細盤，既然入球中位數今次開到3/3.5球，1.68倍入球細抵玩。

（now672台、有線61及201台周一凌晨0:30直播）
緬恩斯作客以穩為先

「蜜蜂軍團」一向以踢法進取見稱，但基於近期賽程緊密，主帥杜曹近期非常專注防守，尤其上輪德甲對拜仁，更不惜起用5名後衞力保不失。再睇埋球隊近7場聯賽有6場開出細盤，當中有5場零失球，可以預期續開入球細機會甚高。

對手緬恩斯近況同樣咁弗，今年已先後擊敗慕遜加柏、史浩克04及拜仁慕尼黑3支聯賽榜前5名勁旅，氣勢如虹，不過佢哋喺周中主場面對防守極硬淨的達斯泰特卻無法破關，下半場更以寡敵眾，今次遇上多蒙特，相信球隊會以穩守戰術應戰，細盤可期。