兵工廠谷行火打老虎

猪拉多纳

足總盃唔搏就四大皆空

英格蘭足總盃16強重賽，衞冕嘅阿仙奴作客英冠球隊侯城，「兵工廠」近期惡戰連場，喺北倫敦打吡以2:2逼和熱刺後，英超爭標機會已愈嚟愈細，歐聯對住巴塞隆拿亦死咗九成，所以足總盃已變成阿仙奴最大捧盃希望，對住實力低一班嘅「老虎」侯城，絕對唔會腳軟，一於撐2.9倍「讓球客勝」。

（開賽時間：周三凌晨3:00）

阿仙奴向來喺足總盃派副選上陣，不過球隊依家受傷兵同狀態影響，正副選已經大執位，上場聯賽做咗後備嘅基奧特同禾確特等球星，今場好大機會披甲上陣，中場高基連停賽，亦有表現討好嘅埃及新兵艾利尼頂上，加上祖爾甘保等前鋒每次上陣都交足貨，戰鬥力依然高過主隊。阿仙奴領隊雲格喺球隊逼和熱刺後亦坦白話，球迷嘅期望為佢帶嚟沉重壓力，試問佢又點會唔落柯打，爭番隻盃向粉絲交代？
心繫升班 侯城隨時又留力

主隊侯城其實最大目標係重返英超，上次作客阿仙奴佢哋一樣收起9名正選，只係「兵工廠」把握唔到機會先搞到要重賽，但亦證明侯城本身亦冇爭勝決心，今場輸波出局一啲都唔出奇。