水晶宮防反犀利剋住紅軍

猪拉多纳

「紅軍」利物浦今晚英超作客水晶宮，利物浦由高普執教之後，繼續保持「神經刀」本色，將英聯盃冠軍拱手讓畀曼城之後，卻可以立即喺聯賽大炒番曼城3蛋。以「紅軍」反覆不定嘅水準，今仗對排名較低嘅水晶宮，失分機會反而更高，寧博受讓嘅水晶宮讓球主勝。

（now621周日晚9時30分直播）

利物浦今季聯賽經常遇強愈強、遇弱愈弱，試過作客擊敗車路士，兩循環都大勝曼城3球，可以打和熱刺同阿仙奴，但又吞過屈福特3蛋、0比2輸畀紐卡素同被韋斯咸「雙殺」，狀態之飄忽真係估佢唔到，記得首循環紅軍喺主場對水晶宮輸咗1比2，今仗作客其實一啲都唔樂觀。
利物浦唔識破密集

利物浦最大問題係後防不穩，上仗英超以穩守突擊戰術擊敗曼城，但面對硬淨防守嘅球隊卻冇破密集本錢，往往只能喺外圍搓波，隔靴搔癢，跟住被對手反擊偷襲得手，先至出現頻頻喺下游弱旅失分嘅情況。相比之下，水晶宮打法直接，主要踢高速反擊搵食，正好剋死利物浦。韋費特沙夏、域咸面對防守脆弱嘅紅軍，將有大把表現空間。水晶宮近4次對利物浦取得3勝1負，就係最佳證明，加上呢場水晶宮主場仲有得受讓，必取讓讓球主勝。