些路迪志在必得 唔怕讓2粒

猪拉多纳

今晚蘇足盃8強有場強弱懸殊之戰，由喺蘇超打橫行嘅些路迪，主場迎戰蘇冠仔摩頓。「綠白兵團」於聯賽兩連和冇晒飛士，梗係想喺盃賽贏番場氹吓班粉絲，射手利治格菲斯又腳風甚順，勢必搵摩頓祭旗，就算讓二球亦照撐讓球主勝。

（周日晚8時開賽）

些路迪於蘇超近乎無敵，唯一嘅敵人就係剩番自己，但好衰唔衰其表現明顯跌Watt，繼1月尾於蘇聯盃慘遭羅斯郡淘汰後，已經畀粉絲噓爆，最近更連續2場聯賽同對方打和，依家喺聯賽只領先次席鴨巴甸4分，冠軍仲未穩陣。
已失1隻盃 搵摩頓祭旗

「綠白兵團」貴為上季國內三冠王（聯賽、蘇聯盃、蘇足盃），今季已經跌咗1隻盃，點都唔想冇埋蘇足盃，難得抽籤咁筍，繼上圈對低組別球隊東基爾布萊德後，8強亦係出戰蘇冠球隊摩頓，絕對係一洗頹風嘅好時機。些路迪陣中只得後衞祖素施梅域一名傷兵，另一守將保耶達雖未能打甩上周末對咸美頓嗰張紅牌，但唔影響佢於盃賽披甲，最重要箭頭利治格菲斯狀態大勇，近6仗入6球着晒火，為冚熄一眾粉絲嘅怒氣，今仗必定大炒明顯差幾條街嘅摩頓洩憤，讓球主客和些路迪讓二球，亦要捧讓球主勝。