將帥贏晒馬體會完勝華倫

猪拉多纳

華倫西亞對馬德里體育會算係西班牙傳統勁旅對碰，不過Sorry，今日焦點應該係英格蘭人加利尼維利同阿根廷人施蒙尼身上。施蒙尼早已證明自己有資格進入名帥系列，至於加利佬呢，仲喺考牌期間囉，以教練質素對碰，施蒙尼贏成條街，加上前仗作客擊敗皇馬，保持微量爭標機會，今仗絕對可以取分而回，馬體會作客讓平半，半個博一個，一定揀上盤。

（now 632周一凌晨3時30分直播）
施蒙尼教波KO加利佬

睇紙上賽績，華倫西亞近6仗贏5場，睇落好似好掂，不過入面水分甚高，包括兩場歐霸盃對奧地利球隊維也納迅速及當時包尾嘅ＣＦ格蘭納達，原則上球隊質高於人，加利佬唔需要點識用腦用計調兵遣將，前仗主場對爛打嘅畢爾包即刻現晒形，竟然大敗0比3。今場華倫要挑戰嘅係同類打法嘅馬體會，而且馬體會實力肯定喺畢爾包之上，加利佬應該唔識點應付。

馬體會主帥施蒙尼喺球員時代球技好過加利佬，不論馬體會、拉素及國際米蘭都有牌落袋，所得榮譽唔少得過加利佬，依家教波就更加犀利啦，前季壓倒巴塞同皇馬贏得西甲冠軍，功力早獲肯定。馬體會近況亦好，前仗小勝皇馬，周中快車再贏皇家蘇斯達，前鋒基沙文兩仗都有士哥，今場又有機會數胡。

華倫西亞仲有一個後顧，就係周中有場歐霸16強，對手又係畢爾包，究竟會唔會令佢哋進退失據呢？既然有懷疑，捧番馬體會就最着數啦！