佐藤壽人掛帥三箭大晒

猪拉多纳

看重聯賽作客鯨魚開殺戒

日職周日上演4場賽事，4支有份出戰今屆亞冠盃嘅日職代表分途出擊，上季總冠軍廣島三箭喺亞冠盃收起隊長佐藤壽人，對衞冕日職似乎較上心，今場呢名王牌復出掛帥，遇上換咗新教練取得好開始嘅名古屋鯨魚，預計入波唔會少，首選大盤。

（周日下午2時開賽）

廣島三箭喺亞冠盃成績麻麻，頭兩場分組賽先後不敵FC山東及FC首爾，出線機會唔樂觀，不過教練森保一呢兩場都冇派王牌前鋒佐藤壽人上陣，畀人感覺「重聯賽、輕亞冠」。事實上，三箭對上兩次參加亞冠盃一次小組包尾出局、一次喺16強被淘汰，從今屆排陣所見，似乎森保一對衞冕日職更為着緊。

三箭上周首輪聯賽雖於主場0比1不敵川崎前鋒，但整體表現唔差，佢哋早前喺日超盃以3比1擊敗大阪飛腳，攻力依然可靠，今仗有佐藤壽人復出攻堅唔愁冇波入。
近4交手2次開「7+」

名古屋鯨魚今季教練由西野朗換上小倉隆史，上仗首次領軍即旗開得勝以1比0擊敗磐田山葉，新加盟嘅瑞典前鋒施莫域仲有士哥，表現比過去幾季有生氣，今喺主場球迷吶喊助威下唔會死守。睇埋往績，兩軍近4次交手一共炮製20個士哥，當中有兩次開「7+」，捧大盤啱數。

另一場FC東京作客鬥仙台維加泰，FC東京係四支亞冠代表經驗最少嘅一隊，連場征戰難免有影響，上場亞冠盃對平陽，如果唔係對方門將「蝦碌」擺烏龍，球隊未必可以全取3分。FC東京首輪聯賽主場面對新升班嘅大宮松鼠都輸0比1，今場作客首仗擊敗橫濱水手嘅維加泰唔易踢，平手盤捧主隊。

（周日下午2時30分開賽）