ＡＣ新腦殘炒車三連發

猪拉多纳

之前有傳AC米蘭唔想留用從利物浦借來嘅「腦殘」巴洛迪利，不過陣中嘅「新腦殘」麥巴耶尼安一樣咁麻煩，呢位法國前鋒於上周末擊敗拖連奴後發生車禍，導致左腳足踝及左邊膊頭受傷，可能要抖2個月。其後尼安喺個人twitter交代事件，話當日座駕因跣胎而炒車，並稱佢同司機嘅傷勢唔嚴重，點解尼安咁緊張強調唔係自己揸車，因為佢喺前年曾捲入一宗炒車案，被罰停牌18個月，雖然今次佢事後接受呼氣測試呈陰性反應，但若果係佢揸車嘅話，就即係無牌駕駛仲大鑊，查實計埋2012年嗰次，尼安已上演炒車「帽子戲法」，麻煩程度拍得住巴神。

至於AC嘅同市宿敵國際米蘭，今晚於意大利盃4強次回合主場迎戰祖雲達斯，國米近6次主場對祖記只得3和3負，明顯畀對手食住，但「斑馬兵團」首回合贏3比0，今仗你急佢唔急，實行歎慢板等收工，捧入球細更佳。

（周四凌晨3時45分開賽）