紅軍蓄銳同狐狸大駁火

猪拉多纳

利物浦幾經辛苦捱過1月魔鬼賽程，嚟到2月，又係另一個地獄賽期，29日入面至少踢7場波，剛喺周日英足盃第4圈對完韋斯咸，抖咗3日都冇又要應付周中英超快車，作客榜首嘅李斯特城，好就好在紅軍大部分主力都冇喺英足盃上陣，今場夠氣夠力砌「狐狸」，李斯特城熱爆射手占美華迪上場打破入球荒，今場唔驚同紅軍鬥攻，大盤可以一博。

（now 621周三凌晨3時45分直播）

紅軍1月踢足9場波，最後一戰就喺英足盃同韋斯咸打和0比0，之後獲安排喺2月中重賽。不過，重賽贏波仲甘，會令紅軍喺2月要踢8場波，包括今場聯賽對李斯特城、歐霸32強兩回合鬥奧格斯堡及月尾英聯盃決賽硬撼曼城，惡啃到暈。所以，領隊高普喺對韋斯咸一仗已經收起拉爾拉拿、羅拔圖法明奴、占士米拿等常規正選，派出多位小將應戰，等班主力抖夠，今場就可以全力應戰，其中搵羅拔圖法明奴頂替賓迪基踢單箭頭效果極佳，唔使驚紅軍入唔到波。
狐狸矢志復仇唔會縮

李斯特城首循環作客不敵紅軍0比1，自此狀態開始回落連場失分，兩大王牌占美華迪同馬列斯遇上入球荒，去到上周聯賽主場鬥史篤城先攞番啲狀態同士氣，大勝對手3比0，占美華迪亦重拾射門鞋。今場「狐狸」再對紅軍，當然想喺自己地頭報番一敗之仇，採取主動搏贏波，紅軍防線一向唔穩陣，大盤唔怕追！