16路幼獅搶奧運門券

猪拉多纳

U23亞洲盃今日殺埋身

U23亞洲盃今日殺到埋身！呢啲兩年一度嘅「幼齒」波乜東東嚟？由來係首屆U22亞洲盃決賽周原於2013年7月喺阿曼舉行，但因為有東亞盃而延至2014年1月先開打，不過參賽球員按年份已大1歲，因此嗰屆結束後，亞洲足協決定將呢項賽事改稱為U23亞洲盃決賽周，由於賽事逢雙數年舉行，亞洲足協索性將今屆喺卡塔爾舉行嘅決賽周，順手變埋今夏奧運嘅亞洲區足球外圍賽，當中頭三名直取奧運入場券，中、日、韓、澳及西亞等16路幼獅，勢必爭崩頭。

今次中國出征U23亞洲盃決賽周，被稱為史上最低調嘅國奧隊。國奧A組對手有東道主卡塔爾、敍利亞及伊朗，隊隊硬嘢，就算殺入淘汰賽，仲可能遭逢更強大嘅日本、南韓及澳洲等，由於只得頭3名先拎到奧運入場券，引述桂神金句，呢支國奧只得渺茫同冇機會。中國足協主席蔡振華早前傳達中央指示，話中國足球係民族復興嘅重要部分，但計劃中冇咩提過奧運足球，加上國奧兩次參加奧運，2008年更係以主辦國身份踢決賽周，即係話只得一次從外圍賽晉級，往績咁曳難怪今次要低調出征。
國奧突圍靠留洋4小將

不過低調反而可為呢班小將減壓，佢哋喺外圍賽3戰全勝轟13球0失球，殺入決賽周。上年年尾嘅武漢四國賽，國奧勇挫摩洛哥、賽和南韓及僅負哥倫比亞，4名留洋小將徐新、李源一、張玉寧及陳哲超表現令人驚喜，前兩者更獲亞洲王者FC廣州（廣州恒大淘寶）招攬，當中強悍中場徐新嚟自馬體會B隊，至於97年出世嘅張玉寧上年加盟荷甲維迪斯，創下中國球員最細年紀登陸歐洲聯賽，佢仲喺對摩洛哥一役梅開二度，被稱為「玉面殺手」，今次佢同95年出世、外流葡萄牙嘅後衞陳哲超，獲主帥傅博破格提拔，力圖完成「不可能的任務」。
首仗遇卡塔爾等交學費

國奧首場出戰東道主卡塔爾U23，卡塔爾U23有3人曾以大國腳身份參加上年澳洲舉行嘅亞洲盃，穆罕默德蒙達利為前線尖刀，而後衞鴨都卡林哈辛及中場阿薩達拉，更喺世盃外1比0擊敗中國之役披甲，絕對唔嘢小，加上國奧近期同伊拉克、阿聯酋及烏茲別克「拍跳」，只錄得1勝2負，相信難擋卡塔爾U23旗開得勝。

（now 671周三凌晨零時30分直播）

至於揭幕戰A組嘅敍利亞U23火併伊朗U23，伊軍以中鋒莫塔哈里名氣最大，連同阿里卡里米及托拉比，實力遠勝大部分仍喺國內搵食嘅敍利亞U23，預計伊軍可輕取對手響頭炮。

（now 671周二晚9時30分直播）