專注聯賽主場博反彈 慕遜加柏夠殺達斯泰特

猪拉多纳

德甲踢埋今個禮拜就歇冬，上半季大起大落嘅慕遜加柏會喺主場恭候達斯泰特。慕遜喺歐聯同德盃先後Game Over，可以集中番火力喺聯賽，對住隊攻又唔得守又唔掂嘅達斯泰特係時候反彈，慕遜讓一球捧1.85倍上盤。

（now670、有線61、64、201及203周一凌晨0:30直播）

慕遜自舒拔接掌之後脫胎換骨，早排錄得連續12仗不敗佳績，直至最近戰績回落，先後喺歐聯、德甲同德盃戰線輸畀曼城、利華古遜同雲達不來梅，3場波足足失咗13球。不過舒拔有樣嘢抵讚，就係即使佢哋有安達夏恩、靴爾文同伊巴謙查奧爾等中前場球員受傷，佢都係一味死攻爛攻，打法好爽好有侵略性。對住曼城、利華就話不自量力，對住達斯泰特？夠殺啦！
客軍質次態沉聽炒

呢隊達斯泰特近7場聯賽贏得1場，當中有4場波食白果，上輪聯賽主場面對哈化柏林都要吞4蛋，實力同狀態都勁唔掂。再講，中場真羅辛度同伊華拿等主將都仲養緊傷，去到慕遜地頭隨時又輸鑊勁。