教授有橋砌低奧林比

猪拉多纳

歐聯F組尾輪大戲，陷出局邊緣嘅阿仙奴作客希臘奧林比亞高斯，阿仙奴要出線得兩條路揀，一係要贏番3比2或更大比數嘅勝仗，一係就淨勝兩球或以上。眾「廠仔」抱住不成功、便成仁嘅決心，面對質遜一籌嘅奧林比，相信可涉險過關，小讓平半可撐上盤。

（有線61及201台周四凌晨3時45分直播）

目前阿仙奴唔單止落後今仗對手奧林比亞高斯3分，上次主場交鋒又輸2比3，由於歐聯同分先計對賽，意味阿仙奴今仗至少贏番3比2，對賽成績相同後再計得失球便可壓倒對手，另一條件就係淨勝2球或以上，但無論揀邊條路，大前提都係贏波。

雖然生死關頭，兼且有阿歷斯山齊士、辛迪卡索拉、高基連等主力因傷缺陣，但阿仙奴後備前鋒祖爾甘保近況甚弗，禾確特亦已於上周英超復出，加埋弗到爆箭頭基奧特及助攻停不了嘅「大眼仔」奧斯爾，阿仙奴勢必火力全開搶攻。
力爭連續16屆出線

當然奧林比亞高斯亦非善男信女，但上仗打和即出線嘅情況下慘敗畀拜仁，一失波即潰不成軍，睇得出呢班波係欺善怕惡，上次作客能夠贏阿仙奴全因對手輕敵，今次「廠仔」有備而來，就算有地利都再難逞強。主帥雲格賽前話佢哋目標鮮明，而且充分了解奧林比嘅戰術特點，好有信心過關，仲話若果連續16屆殺入淘汰賽，對球隊同球員均意義重大，既然「教授」落柯打，「廠仔」必定搏甩髀爭勝，阿仙奴今仗小讓平半，上盤不容錯過。