愛華頓防線穿窿 水晶宮受讓嗒糖

猪拉多纳

今晚英超獨腳戲，愛華頓主場迎戰水晶宮，「拖肥糖」上輪聯賽同般尼茅夫大演入球騷，「過山車式」打和3比3，無錯前線盧卡古、巴克里等主力係好弗，但弊在後防立立亂；水晶宮今季好惡，作客贏過利物浦、車路士，主場亦和過曼聯，加上過去兩次作客愛華頓都贏波而回，今場作客受讓要捧呀！

（now 621周二凌晨4時直播）
柏杜落「柯打」至少要和

水晶宮領隊柏杜屬有料之人，球隊喺佢接手後水準保持唔錯，屢有佳作，睇番聯賽榜，原來水晶宮係今季最少和波嘅一隊，14戰錄得7勝1和6負，今仗賽前柏杜就落Order要班波學識和波：「雖然依家淨係得前4名球隊勝仗多過我哋，但水晶宮已經輸咗6場，如果球隊要有突破，取得歐洲賽席位，就要學識去和波，若然做得到，季尾起碼可以多6、7分，或者會成為可唔可以進軍歐洲嘅分野。」好明顯，水晶宮今場作客愛華頓嘅最低目標，就係要保住不敗。
水軍上兩次造訪都贏

「拖肥糖」呢隊波攻強守弱，「小魔獸」盧卡古同巴克里最近頻頻入波，前者更以10個聯賽入球排緊射手榜次席，周中英聯盃翼鋒迪路菲奧都有好表現，不過球隊喺巴利、菲臘積基爾卡及白賴仁奧維度等守將因傷缺陣下，防線穿晒窿，上場聯賽對般尼茅夫早早領先兩球，最尾都可以和3比3完場。「拖肥糖」對上兩次主場都輸畀水晶宮2比3，明顯比對方嘅穩守突擊打法剋住，今場分分鐘輸埋唔奇，都係捧番受讓嘅水晶宮好過！