機員伐木者蓄細爭霸

猪拉多纳

終極戰睇定嚟踢

美職季後賽總決賽，東岸冠軍哥倫布機員主場迎戰西岸盟主波特蘭伐木者。兩軍今季表現、成績不相伯仲，而且防守同樣有番咁上下，喺一場過嘅決賽難免會踢得較為保守。睇番對上六屆美職總決賽有五次開細，其中四次需要踢加時、甚至互射12碼決勝負，今場首選入球細。

（TVB 302周一清晨5時直播）

哥倫布機員同波特蘭伐木者今季喺常規賽同樣攞到十五勝八和十一負成績，機員僅以較佳得失球差壓過對手，足證兩班波實力相當接近。機員季後賽先後淘汰蒙特利爾衝擊、紐約紅牛成為東岸冠軍；衝擊陣中有星級前鋒杜奧巴壓陣，紅牛就係常規賽入球最多嘅球隊，機員能夠封殺對手連過兩關，足證防守有一定板斧。塞拉利昂前鋒基卡馬拉係機員最可靠入球來源，今季已為球隊轟入廿二球，不過今仗相信會遭伐木者嚴加「招呼」，要發圍入波絕不容易。
伐木者作客以守為先

伐木者今季三十四場常規賽失三十九球，係常規賽失波第二少嘅球隊之一，陣中尼日利亞前鋒費蘭度亞迪腳風超順，至今已取得十六個聯賽入球。兩名後衞波查斯及祖斯貝利除踢法穩健之外，亦不時上前助攻，目前兩人均各有三球進帳。不過，今次畢竟係伐木者史上首次打入總決賽，大戰經驗較淺兼冇地利之助，預計伐木者會以守為先，唔敢過分冒進。

今場比賽以一場過決勝負，如果打和將加時三十分鐘，再和就以互射12碼決勝。過去六屆總決賽有四次喺法定時間之內打和，當中五次開細盤，以今屆兩軍表現及踢法嚟睇，再開細盤機會極高。