黃蜂採花標尾會

猪拉多纳

今日下午爆發日乙升班附加賽決賽，大阪櫻花主場對福岡黃蜂，勝方下季將可升上日職，今場對兩軍嚟講無疑係季內最重要一仗。福岡黃蜂季尾愈戰愈勇，最後8場常規賽全勝，銳不可當。大阪櫻花早前經歷換帥，但效果一般，今仗要讓波未免受高估，捧1.64倍嘅福岡黃蜂讓球客勝。

（有線61及201台周日下午2時35分直播）

大阪櫻花下半季表現走樣，最後10場常規賽只得2勝，巴西籍教練奧度利上月中更被炒魷，由大熊清臨時接手領軍。櫻花喺大熊清執教下2戰獲1勝1和，包括上場附加賽同FC愛媛悶和0比0，櫻花僅僅憑常規賽排名較高而「優先」晉級，可謂靠賽制幫手，欠缺說服力。
櫻花傷兵多難排強陣

大阪櫻花另一個不利因素係傷兵眾多，射手永井龍、中場吉野峻光、後衞藤本康太及染谷悠太都因傷缺陣今場生死戰，另外有傳隊長山口螢將於球季結束後去歐洲搵食，唔多唔少影響軍心，今場仲要讓波好牙煙。

福岡黃蜂走勢凌厲，最後8場常規賽贏晒，弗到漏油，最後僅因得失球較差而屈居第3位，未能直接升班。事實上，黃蜂常規賽積分達82分，比櫻花多15分，反映雙方實力有明顯距離。黃蜂上仗附加賽亦以1比0擊敗長崎成功丸，前鋒威靈頓路爾斯近2仗入3球，狀態大勇，黃蜂贏埋唔奇，讓球客勝有計。