利物浦大開殺戒

猪拉多纳

返嚟啦！大師兄，二師兄……全部返晒嚟啦！利物浦今期最「紅」，豪取4連勝，當中英超大炒曼城4比1，英聯盃更炒修咸頓6比1，最緊要係一眾主力傷愈回歸，今場作客紐卡素，隊長佐敦軒達臣、高效射手史杜列治都有望正選上陣，轟爆「喜鵲」弱雞防線，一於捧入球大！

（now 621周一凌晨零時直播）

利物浦自10月委任前多蒙特教頭高普接手，經歷短暫嘅磨合期後，球員逐漸適應高普嘅壓迫性快速打法，開始發揮威力，近8場贏足7場，當中作客表現更佳，分別喺聯賽KO車路士同曼城3比1及4比1，周中英聯盃8強作客修咸頓更誇張到狂數「聖人」6比1，將3支勁旅打到落花流水，兩連敗共失8球嘅紐卡素睇嚟都係難逃一劫。
紐卡素兩連敗不設防

最重要係紅軍一眾主力陸續傷愈回歸，雖然安利簡恩今場要停賽，但仲有傷愈嘅隊長佐敦軒達臣，負責校炮放長傳，雖然菲臘比古天奴據報有傷上陣成疑，但中場仲有羅拔圖法明奴後上支援前線兩大「黑色力量」史杜列治同賓迪基，高普喺必要時仲可以調入佐敦伊比、拉爾拉拿、奧歷治等攻擊球員改變戰術，加強火力。

相反紐卡素喺庸帥麥卡倫帶領下毫無起色，最近兩場聯賽先畀李斯特城炒3蛋，跟住對水晶宮再輸1比5，之前10月初亦試過畀曼城狂炒1比6，防線完全不設防，最近更有防中迪奧迪腹股溝受傷，今場好大機會繼續缺陣，冇埋呢個中場屏障，紅軍一班攻擊手可以開大餐咯！