墨爾本城喪攻殘陣光輝

猪拉多纳

今季澳職有2隊波作客成績曳到爆，到依家錄得全敗紀錄，其中就包括珀斯光輝。呢支作客蟲今日晏晝造訪澳職火力王墨爾本城，怕且都冇機會全身而退，而且佢哋前中後缺3主將，就算受讓半一都捧唔過，1.82倍上盤好路。

（有線64、203周五下午4:40直播）
光輝作客4連敗

珀斯光輝今季作客戰鬥力極弱，計埋澳總比賽，佢哋連輸4仗，表現令人失望。仲有呀，呢班波攻擊力一樣唔掂，今季聯賽入得6粒同阿德萊德聯並列澳職最差。佢哋對上3次客途出戰更通通食白果而回，更大鑊嘅係佢哋陣容不整，箭頭古安費南迪斯、中場基奧基辛杜、守將祖碧特全部都唔掂，前中後主力三線休戰，今仗仲點旨意佢哋可以搶分先？
攻擊鐵三角火力猛

雖然主場出擊嘅墨爾本城走勢未見突出，近3仗成績勝和負各一，好在佢哋火力夠猛。喺今輪聯賽未開始前，墨爾本城以13個入球成為澳職火力王，計埋盃賽近4場主場勁轟10粒，前鋒科拿路利、中場阿倫穆爾輪流發威，哈利洛維奴上仗更入波開齋，成班波士氣唔錯，呢個「攻擊鐵三角」肯定出盡力幫隊波反彈，點計都係墨城值得秤先囉。