巴拉福特殺「迪」唔留手

猪拉多纳

今晚有場英總第1圈重賽，昔日喺英超打滾過嘅巴拉福特，會喺主場恭候艾迪索特。巴拉福特前鋒比利奇勒傷愈後搵番射門鞋，而且佢哋近期走勢強勁，相信英格蘭非聯賽隊伍艾迪索特唔會再咁好彩，一於捧2.05倍「讓球主勝」。

（開賽時間：周四凌晨3:45）

雙方上周日互交白卷，睇番賽後報告，查實巴拉福特佔盡上風，控球權同攻門次數都贏晒，奈何就係爭個入波。好在，曾經喺英冠威過吓嘅前葉士域治射手比利奇勒，最近克服膝部傷患，復出後愈踢愈有，上場聯賽仲有波入添，佢仲帶領巴拉福特砌低克魯，連續7場英甲不敗，走勢一流！
艾迪索特近4場不勝

對家艾迪索特剛啱喺聯賽淨吞京達米士特兩蛋，連續4輪聯賽失分，領隊巴利史密夫嬲到爆，講明今鋪會大變陣出擊喎。喂，你隊波咩新鮮蘿蔔皮呀？正選嗰班都唔掂，唔通副選嗰堆二打六會幫到隊波咩，上場劣勢摸和巴拉福特係好彩，今晚去到巴拉福特地頭，睇怕都係難逃大敗。