紅魔夜襲中央陸軍

猪拉多纳

重臨福地要食大茶飯

紅魔鬼08年喺莫斯科捧走歐聯冠軍，今仗作客莫斯科中央陸軍，又去番「福地」比賽，肯定會特別醒神，信心都高啲。不過，中央陸軍亦非善男信女，射手杜姆比亞大勇，近期瘋狂數胡，又有蘇蘭托錫倒戈，亦要畀番啲顏色曼聯睇。由於目前B組4隊同分，競爭極之激烈，雙方都要搏盡搶分，加上曼聯今季重返歐聯後4場全開大，首選入球大。

（有線61及201台周四凌晨2時45分直播）
福地作戰特別醒神

曼聯對上一次捧歐聯，要數番08年喺莫斯科盧日尼基球場，憑互射12碼戲劇性擊敗車路士。今仗再赴福地比賽，當年捧盃功臣主力朗尼同卡域克仍然在陣。雖然並非同一個球場，但球員心理上始終會覺得呢個城市旺佢哋。08歐國盃外圍賽，英格蘭作客俄羅斯，朗尼亦喺莫斯科入波，可見紅魔去到當地，的確零舍醒神。

朗尼近期腳風亦順番，上仗英超又入波，曼聯鋒線依家可以發揮最強威力。事實上，曼聯今屆重返歐聯，球員特別落力進取，包括附加賽在內，4戰攻入10球且全部開大，今仗鋒線精銳盡出，入波機會更加樂觀。
杜姆比亞腳風超順

至於莫斯科中央陸軍踢歐聯，同樣有前冇後，連外圍賽同附加賽在內，今屆6戰5次開大，包括上仗分組賽主場3比2擊敗燕豪芬，當時上半場已經攻入3球，新季重返球隊嘅杜姆比亞梅開二度，呢位科特迪瓦前鋒把握力強，勢必成為紅魔防線心腹大患。

另外，曾失意於曼聯嘅蘇蘭托錫，加盟中央陸軍之後獲得重生，今季俄超已有3球進帳，呢位塞爾維亞國腳能傳擅射，重遇曼聯，勢必大踢身價波，為自己爭番一口氣。兩軍進攻本錢充足，又有爭勝心，唔難出現鬥攻場面，大盤好路。