皇馬杜拜斬殺AC

猪拉多纳

3800萬戲金 強陣出征

英超聖誕新年快車嚟到今日終於都停一停，去到元旦日先重新啟動，不過今晚仍然有場大戰等住大家，就係首次參戰杜拜挑戰盃嘅西甲勁旅皇家馬德里對意甲過氣豪門AC米蘭，「銀河艦隊」一啲都冇睇小呢場熱身賽，派出22人強陣出征杜拜，應可輕取傷兵滿營嘅AC，讓球主勝值得一博。

（有線61及201台周三凌晨零時直播）

身為2014年嘅「四冠王」，皇馬今次參戰杜拜挑戰盃嘅「騷錢」當然唔會少，據知出場費高達400萬歐元（約3,781萬港元）。收咗咁多錢，「銀河艦隊」當然識做，除咗莫迪歷、馬些路同沙治奧拉莫斯因傷未有隨隊外，C朗拿度、加里夫巴利、占士洛迪古斯、卻奧斯、卡斯拿斯等大牌球星全部都喺大軍名單，明顯好重視呢場波。皇馬對上22場波全部贏晒，球隊上下當然想一直由年尾贏到出年，今場係熱身賽又如何？一樣照殺！
褪色豪門仲要殘陣

球迷都知AC米蘭近年距離勁旅行列有一大段距離，係褪色豪門，正喺杜拜參加全球足球論壇嘅前AC名帥卡比路日前更話AC需要3年時間嚟恢復競爭力。其實卡帥一啲冇講錯，AC今季搵嚟名宿恩沙基執教，正式踏入重建階段，球隊問題多多，並非一時三刻可以解決得到，即使今季表現有所改善，但仍難與歐洲列強匹敵，更遑論抗衡歐洲王者皇馬。

AC今場更有中場雲堅基爾及艾辛、後衞迪施基利奧、阿歷士洛里高同阿比迪因傷上陣成疑，大將本田圭佑就返咗去日本備戰亞洲盃，個陣殘成咁，今場受讓都制唔過，捧讓球主勝！